Ru∙utbea somoioni dam 844 adhoc Upper Primary skulrangko deficit-ona ra∙gatchina sorkario dabianiko nipiltaichina Meghalaya Upper Primary School Teachers Association (MUPSTA), Education Minister Rakkam A. Sangma ko Sombar salo grongangaha. Re∙anggipa MDA sorkario iani bidingo dorgastoko on∙manahachim. Da∙o ia apsan dabianikon Education Minister baksa chanchirime jakko on∙e kam ka∙pachina mol∙molangaha ine MUPSTA ni President Kenneth Shadap aganaha.
Adhoc skulni skigiparangna beton on∙anirang namen komiaha aro bang∙bata skigiparangan an∙tangtangni dedrangko chubata gadango poraiatna gita chol ong∙jaenga ine uamang parakangaha. Chasong gni mang ong∙piloba sorkarini dingtangmancha dakchakaniko adhoc skulrang man∙kujaenga aro skulko nirok simsakna, taridapna dakchakani, indin uniform rangko chatro chatri rangna on∙anirangko SSA skulrangsa man∙enga ine ua agandapaha.
Adhoc skulo skigiparang, sianggipa aro kamtangoni nengtakgiparangni biaprango kamna ra∙napanioba neng∙nikaniko man∙enga jeon sorkarini tarigimin niam gita adhoc o skigipani kamna MTET ko matchotgipakosa ra∙napnagita man∙a. MTET ko nangchongmotaniko ra∙galchina jedakode adhoc skulo skigiparangko nengrae ra∙napna man∙gen ine Education Minister ko nambate nirokangchina Shadap didiangaha.
