A∙dok sorkari gitalgipa tourism policy-ko June jani 30 tariko ra∙gate, 2028 bilsiona 10 billion kajinnako ra∙bana nikjumanganiko chu∙sokatna re∙mikkanggen ine Tourism Minister Paul Lyngdoh u∙iatangaha. Meghalaya a∙doko nitogipa biaprang bang∙beaniko nike sorkari tourism ko tang∙doatanichi a∙dokna kajinna man∙dapanirango gamchatbegipa ong∙gen ine parakangaha. Dingtang dingtang kamrango jekai rika cho∙ani, rama jal∙angko namdapatani, private sector rangni bak ra∙ani aro naljokgipa tourism ko ra∙bae on∙anian ia policy-ni nangchongmotgipa a∙damo kam ka∙ani ong∙gen ine Lyngdoh aganangaha.
Meghalaya ona tourist ba songre songgabatgiparang lakh 15 mangni gita re∙baronga ine Lyngdoh janapenba tourism ko tang∙doatna, Asian Development Bank aro World Bank ni dakchakaniko man∙anggen ine ua u∙iatangaha. Policy ni gita u∙iatanio 2019 bilsio a∙dokona tourist rangni sokbaara lakh 12.7 ong∙achim jeon a∙palchini 25,000 manderang re∙bae bak ra∙angpaaha. Ian Northeast-o Assam aro Sikkim a∙dokni ja∙man gittamgipa ong∙a. 2024 bilsio tourist rangni sokbaaniko lakh 15 ona ga∙dapatna jotton ka∙gen ine ka∙donganiko Lyngdoh on∙angaha. Sorkari pilak kamrango nirokgipa aro dilgipa ong∙e sakanti bakko ra∙giparangna dakchakaniko on∙e kam ka∙angen ine ua agandapangaha.
