Meghalaya a∙doko, dingtang dingtang bakrangoni sak hajal chi∙chet mang skigiparangna Indira Gandhi National Open University (IGNOU) aro National Institute of Open Schooling (NIOS) apsan nangrime dingtang dingtang gadangni gita skie ra∙anirangko on∙na miksongenga ine Education Minister Rakkam Sangma parakataha. Iako dakanichi skigiparangni changa sapaniko aro u∙i-ma∙sianiko namdapatna sorkarini ja∙ku de∙aniba ong∙enga ine ua agandapangaha.
Ru∙utgija sal-somoirangni gisepon National Testing Agency-ni Chairman aro a∙dokni dilgiparang baksa chanchirimaniko dakange skigiparangni kam ka∙aniko namdapatna kamrangko ka∙anggen ine Education Minister parakataha.
Education Minister, a∙doko skie ra∙ani a∙bao dingtang dingtang neng∙nikanirangko jekai CUET aro gipin gadangrango, chagrongengani bidingo a∙dokni Chief Minister Conrad Sangma baksa, Union Human Resource Minister ko New Delhi-o gronge chanchirimaniko dakna tik ka∙e donangaha ineba u∙iatangaha.
