Ma∙mong sorkarini, skulrango skigiparangni neng∙nikanirangko namdapatna miksonge tarigipa ge∙sa dal∙gipa project, teachers’ attendance monitoring system ko a∙doko ra∙gatna mijal salni bako tik ka∙angaha ine Education Minister Rakkam A. Sangma parakataha. Ubiattendance App ko ra∙gatani gimin bang∙a skigiparangan app ko jakkalna kusi ong∙gijaniko parakachim indiba ia app-ara skigiparangni attendance ko u∙inagita jakkalgipasa ong∙a ine Sangma aganangaha.
Ia Ubiattendance app ko skanggipa East Jaintia Hills a∙jao jakkalchengatna miksongenga. Ia project ko ra∙gatanichi skigiparangni skulona re∙aniko u∙ina aro skul bi∙sarangni namdapaniko ma∙sie ra∙naba man∙gen ine Sangma aganaha. Jensalo ia programme ko ra∙gatahaon a∙dokni kona-noksiko dongenggipa skulrangni chong∙motgipa neng∙nikanirangkoba ma∙sinagita man∙gen ineba ua agandapangaha.
