Sombar salni bako, Meghalaya ni Director General of Police (DGP), Dr. LR Bishnoi, sima-ario donggipa BSF sipairang aro ua jolni manderangni ma∙sisretgrikanirangko bon∙atna gita songni Sordar aro Village Defence Party dolrang baksa name golpogrikaniko dakna nangchongmotenga ine aganaha.
Ia ma∙sisretani gimin golpona nangani bidingara, re∙anggipa Robibar walni 10 baji mango, East Khasi Hills a∙jani Dawki sepango donggipa Umsyiem songni sima-ario BSF outpost ko manderangni chadrapani a∙sel aro uamangko kenatna gita BSF rangni bangbango slai gopongani gimin ong∙anggen ine ua u∙iataha.
Mikkangchi uamangni gisepo nanggrikanirang dongjachina aro ua jolo dongenggipa manderang baksa bakrime kamko ka∙angchina pulisrang sima-ari ko chelchakenggipa BSF dolrang baksa agan-golpogrikaniko dakanggen ine DGP Bishnoi agandapaha.
