Soil & Water Conservation ni Minister Marcuise Marak, bilsianti a∙brirangko o∙e a∙ba cha∙e buring bolgrimrang komiangani a∙selo a∙a ruronge a∙salrang bon∙angani ko champengna Sloping Agriculture Land Technology (SALT) ko a∙dok gimiko ra∙gatanggen ine u∙iataha.
SALT ko skanggipa changna East Garo Hills a∙jani Mandalgre songo June 5 tariko Environment Day ni salo a∙bachengataha maina Garo Hills o damsa mongsonggipa aro bakrobatgipa Simsang chibima ia songoni jokonanga aro ia Technology ko jakkale Simsang chibisik rangko tange rakkina man∙gen ine ua talatdapangaha.
Ia Technology o gadang bonga dake ge∙a gamanirangko dakanggen. Skanggipa gadango dal∙dalgipa bite nanggipa bolrang ko ge∙anggen, apsandaken gnigipao bite nanggipa bolrang jekai komilarangko ge∙anggen aro gitchagipa gadangrango mi-misi aro gipin a∙bao ge∙enggipa ma∙manti bolam biterang ko ge∙angskagen.
SALT ko a∙bachengatani miksonganiara bilsiantian a∙brirangko o∙e a∙ba cha∙aoniko champengna, game-ge∙e cha∙enggiparangna dingtang cholko dake on∙anian ong∙a. Ia Technology ko Garo Hills mangmangosan ong∙aigija, a∙dok gimikon ra∙gatanggen ine Soil & Water Conservation Minister agandapangaha.
