Rongram-ni Executive Magistrate aro Block Development Officer, Rongram bajar committee ni kosako Ganol chibimao jabol ong∙atani bidingo dai gamchina gita rai on∙angaha aro dam-o skonggipa jabolrangko konta 24 ni gisepo rongtalatchina gitaba ge∙etaniko dakangaha. Ia ge∙etaniko mikka jimbee waangani ja∙man June 22 tariko dakaha maina jabol galanirangko nie dongaigenchim ong∙ode haida mikkangchi neng∙nikani ong∙naba gnang aro ia chibimaniko PHE department Tura songjinmaona salange jakkalanirangko dakenga ine parakataha.
Ia dai ko ra∙gataniara Tura District Disaster Management ni dongimin niamni ning∙o ong∙a aro ia dai-ni tangkarangchi Rongram bajarko rongtalatna gita aro bajar-o jabol galchakaniko tarina gita jakkalangskagen, unbaksana bajarni plak membor-rangna mikrakataniko on∙a gita program-rangko ong∙atanggen ineba parakataha.
Ia jabol galanirangko dakaniara bajar committee ni nirok simsakgijani a∙sel aro gila kem∙aniko dake rongtalatimgipa manderangko rakkie rongtalatanirangko dakjani a∙sel ong∙a ine u∙iataha.
