A∙dokni Education Minister Rakkam Sangma aro department ni dilgiparang re∙anggipa sal rango Garo Hills ni dingtang dingtang skul rangchi wene nirok sandianiko dakangaha. Uamangni wenani miksonganiara Garo Hills ni SSLC aro HSSLC porikka rango chatro chatri rangni name chu∙sokna man∙jani gimin aro adita bilsirango maming namdapaniko nikjani bidingo ong∙a.
Ian a∙doko skanggipa changna skul rangko nirok sandianiko dakenga aro District ge∙antini DC aro Officer rang baksaba review meeting koba ong∙atangaha. Unbaksana department ni gita uamangko skul rangona re∙ange sing∙sandianikoba dakchina ge∙etaniko on∙angaha jekon ja sa ni gisepo report ko tarie sokatna nanggen ineba uamangna u∙iatangaha, je dakode mikkangchi skul rango chatro chatri rangni porikkarangko seanio nambata gadangona sokdoatna man∙gen ine Rakkam Sangma agandapangaha.
Ia nirok sandianiko dakani namen chu∙sokgipa ong∙aha aro report rango pangchake maikai mikkangchi department ni gita Garo Hills ni skia-poraiani gadangrangko namdapatna man∙gen iarangko chanchie ja∙ku de∙anggen ineba ua aganangaha.
