Garo Hills-ni A∙chik chadambe saksa doka-damanio changgipa sapgipa, Ambasal Ch. Momin, batanggimin June 18 tariko Carmina Burana Concert-o Philharmonie of University Vienna baksa, Konzerthaus Vienna, Austria a∙songo uni doka-damaniko dakmesokangaha. Ia dakmesokanio bakko ra∙na gita India National Youth Orchestra and Chorus-ni chu∙gimik sak 26 mang seokako man∙aha aro Ambasal Momin ba uano dakmesokna saksa seokako man∙pagipa ong∙aha.
Ambasal Momin saksa violin, bass guitar aro classic double bass ni a∙bao namen changgipa sapgipa ong∙a aro ua da∙o double bassist ko Vienna-o skie ra∙angskaenga ine koborko u∙iataha. Ia concertko ong∙atani miksonganiara bilsi 75 na India aro Austria a∙songni meli nangrime donganiko gisik ra∙e manina gita ong∙ataha. Apsan dake ia bilsini re∙baenggipa October 29 tariko Lucknow-o aro October 31 tariko New Delhi-ona Austria-ni doka-damgiparang re∙bae concert-o bak ra∙angskagen.
