Samtangtango donggipa buring bolgrim aro matburingrangni gamchataniko ma∙siatna aro u∙ianiko ra∙bana, Garo Hills Environmental Protection Society (GHEPS) ni gita Daribok jolo songdongenggipa manderangna, Nokrek-o skie on∙aniko dakangaha. Ia skie on∙aniko Pamong Durasal R. Marak, GHEPS ni Vice President dilaniko dakaha aro unbaksa adita toromni dilgiparang, AB Krima IV ni director, Turani MDC Bernard Marak aro bang∙a gadangni dilgiparang donge bakko ra∙angpaaha.
GHEPS ni President, Dr. Merril N. Sangma, buring bolgrim aro matburingni gimaanganiko ta∙raken ripingani ja∙kurangko de∙na nangchongmotenga ine ku∙mongani kattarangko aganangaha. Uni agananio ua Isolni ong∙atgimin sam-biterang, mesu samjakrang aro sanna bannanio jakalgipa sambolrangko ripinganian an∙chingni skanggipa dakna nanggni kam ong∙a ine didianiko on∙angaha. GHEPS dolni dilaniko Forest Department ni officer-rang namnike bakrimpaaniko on∙an baksa bolpang bi∙sako sakanti bak ra∙gipana on∙angaha. Unbaksa bol wa∙ako ripingna sakanti bak ra∙gipa songni manderangko ku∙mikchetanikoba dakdilangaha.
