VPP dolni namgija kam ka∙anirang aro niamchi sinjete kam ka∙na am∙ani bewalrang ru∙uta salrangna baikamgipa ong∙jawa ine NPYF ni ku∙wattimgipa Bajop Pyngrope aganaha. Da∙ororo VPP dolna balwa namaniko nikna gita man∙enga maina gipin partyni dolrang District Council Election aro re∙baengipa Lok Sabha election na darangba kam ka∙na a∙bachengkujaenga.
VPP ni dilgiparangni gisepo meligrikgijani dongani a∙sel neng∙nikanirangko chagrongna nangnaba donga. Jajaani aro meligrikgijani pangnan dilgiparangni gisepona sokbaaigen maina jatrangni gisepo bak dakatna kam ka∙anio bang∙a a∙dokni manderangan namnikgijaniko nikna gita man∙gen ineba ua aganangaha.
Reservation ni bidingo pangchake jatna meligrikgijaniko ra∙baaniko NPYF ni gita raken jegala ine ua parakangaha. A∙dok sorkari Policy ko namdapatna kam ka∙anio u∙i ma∙sigiparangko jakkalna gita nanga jedakode a∙dokni mande sakantinan ia niamchi namgniko ra∙bana man∙agita uamangba ku∙pattianirangko on∙pana amgiparang ong∙gen ine ua agandapaha.
Chadamberang sorkarini kamkosan ong∙gija, kam ka∙e cha∙ani dingtang cholrangkoba niatna gita nangenga maina sorkarini gita kamrangko bilsiantian 2000 mangnasan on∙a man∙enga. Uni gimin sakanti chadamberangko sorkarini ong∙atenggipa Prime Hub, YESS Meghalaya aro Meghalaya Grassroots Music Project-o bak ra∙e an∙tangtangna cholrangko ra∙pachina ine Pyngrope ku∙monganiko on∙angaha.
