Meghalaya Pradesh Congress Committee (MPCC) ni dal∙batgipa dilgipa Vincent H Pala, NPP chi dilenggipa sorkario BJP dolrangko ra∙galgenchim ong∙ode, Congress dol MDA 2.0 baksa bakrimpana kusi ong∙gen ine June jani 21 tariko parakangaha. Uni dolni, NPP sorkari baksa chakpana skaniko parakataniara KHADC o NPP baksa melie UDP chi dilenggipa executive committee be∙gruani ja∙mano ong∙aha.
Kobor ra∙timgiparangni adita Congress doloni 2023 assembly election-na skang ong∙kate NPP dol baksa bakrimani bidingo maiba raka ja∙kuko de∙genma ine sing∙on, batanggimin salo ong∙a obostade da∙oni ong∙enggipa baksa bilongen dingtanggrika ine ua aganangskaaha. Chinga party ni namnike ra∙chakaniosa Council o executive committee-na chakpaaniko on∙aha indiba Dr. Ampareen Lyngdoh aro gipin sakbri dilgiparangde uamangni ska aro namnikaosa NPP sorkari baksa bakrimna ong∙katangaha ine ua agandapangaha.
Vincent H Pala ni aganani gitade KHADC-o BJP dolrang maming bak rengsi dongpajani a∙selosa Congress dolrang NPP na chakpaaniko on∙aha. NPP dol BJP baksa bakrimangkuode aro KHADC-o BJP dilgipa dongenchimode, Congress dol NPP-chi rikenggipa MDA 2.0 sorkario maming saloba bakrimjawa ine ua agandapangaha.
