South Garo hills a∙jao adita salrangna skang St Francis De Sales School-o poraienggipa chatro saksako namgija bewalo jakkalanina badi ka∙ako man∙gipa skigipa, Surujuddin Ali ko, schoolni kamoniko ra∙galataha ine koborko man∙soaha. Uni kosako Rongara-Siju constituency-ni gitcham MLA Rophul S. Marak manderangni janapataniko man∙e adita salrangna skang badi ka∙angahachim.
U∙iatani gitade ua salo skigipa class-o skiengmitingo bi∙sa sakgni je∙grikaha ine knana man∙aha. Uamangni jegrikaniko nike skigipa bi∙sa sakgniko mikkangchina okamaton saksa chatro de skigipani kattako ra∙e re∙baaha indiba saksade manigija dongaha ine koborko parakataha. School Managing Committee (SMC) ni parakatani gitade skulo chatro chatrirang niam retiko ja∙rikchina aro skigipa kraa bewalo kamrangko ka∙china, skigipa aro chatroni kosako raka sasonko on∙a nanga ine u∙iataha.
