Bamon Konchikolgre songo CC-Jeepable dollongko tarigija galchipe donenga ine ua songni manderang Niksamso Garo Community Organisation (NGCO) na u∙iataha. Uamangni u∙iatani gimin NGCO Head Quarter ni gita re∙ange nion, songni bi∙sarang jerangan chi nalsaoni ga∙bate skul re∙engachim uamangni neng∙nikanirangko man∙anio sorkarini develop ka∙na on∙atako ka∙gija ru∙uta bilsirangonin mamingkon dakja ine aganan baksa scheme-ni sanction ka∙gipa lekkarangni report rangko nikaniode matchotgiminko mesokaha indiba biapona re∙ange niode ru∙uta somoina galchipgipa dollongkosa nikbaskaaha ine parakataha.
Indake sorkarini namgnina chamatgipa tangka paisarangko jakkalsrete songni nokni develop na on∙atgiminrangko cha∙bokaniara jatko aro a∙songko cha∙bokanisa ineba agandapangaha.
Ia obostani kosako sorkarini gita rake sandianiko dake sinjetaniko dakna nanga aro apsan daken gipin neng∙nikaniko man∙enggipa biaprangkoba nirok simsakaniko dakna nangchongmota ine aganangaha.
Sorkarini gita je departmentni ning∙o ong∙e ia kamrangko nirokani ong∙achim, uamangba nirok sandigija skatang kamrangko matchotaha ine report rangko on∙jachina ineba raken u∙iataha.
