June jani 15 tariko Phudmuri Presbyterian Gilja nok, mali-1, Mawlai Mawdatbaki-ni gopram sambao donggipa Trophius Nongbri an∙tangni jikgipa bilsi 30 ong∙gipa Stefani Lyngdoh Nonglait ko so∙ataha, jean jagnina an∙o gnanggipa ma∙gipa ong∙achim ine parakataha.
Sianggipani nogipa Amanda Lyngdoh Nonglait gumetangni kosako Mawlai pulis station-o badi ka∙aha, maina uni gumetang Stefani antangko so∙ote sia inesa aganachim, indiba uni aganani gitade abitang an∙tangko so∙ote sia ong∙ja maina sigipani gitoko so∙otani dagi donga ine u∙iataha.
Sianggipani noksulrangni aganani gitade ua an∙tangko so∙ote sina kraja maina be∙eni aro gisikni gita bilakgipa mande ong∙achim aro uni segipa jikgipa gitcham baksa ka∙sagrikuenga ine nogipana u∙iataba dongachim, unbaksana sina skang uamangni ka∙sagrikani gimin ba pakmao see donangaha. Manggisiko man∙gipa nokdringo maming an∙tangko so∙ote siani chin rang dongjachim aro gitoko dagi dongani miksonganiara uko rim∙geke so∙otaha ine agandapaha.
Mawlai Mawdatbaki Dorbar shnong dolni manderang walni 10 baji mango pulis na u∙iataha aro pulis dolni dalbatgipa sing∙sandianiko dake ua dosi dakgipako IPC ni section 320-o pangchake segataha aro manggisiko NEIGRIHMS-o porikka ra∙na maharirangni jako on∙ataha.
