Meghalaya a∙dokni sakgittam gisiko nanggipa chadamberang Union Public Service Commission (UPSC)-ni prelims porikka-o chu∙sokgipa ong∙aha indake uamang da∙o re∙baenggipa September jao ong∙nasienggipa mains porikkana tarisamsoaniko dakskaengaha. Ia sakgittam chadamberangara Nidakyrkhu Dkhar, Anmiel Azareel Syiem aro Thomas Edison Sumer ong∙achim. Uamang All India Service Pre-Examination Training Centre jean Meghalaya Administrative Training Institute (MATI), Mawdiangdiang oniko dakchakaniko man∙ahachim.
MATI campus Mawdiangdiang o dongenggipa institute, jeon sak ritchasa kolgrik bongana bate chadamberangna bilsi antian skianirangko on∙engachim aro hostel-o dongchakna gita man∙achim. India-ni dingtang dingtang bakrangoni skigiparang online ba offline gita salantian class rangko ra∙e batch ni kri porikkarangkoba ra∙rongengachim.
Indake da∙o ia Institute o sakgittam chadamberangna mains porikkana tarisamsona gita a∙bachengatengaha. Lakh 10-na bate chadamberang UPSC porikka-na galahachim, indiba sak hajal chi∙bri-ni gitasan mains porikkako sena gita seokako man∙aha.
