A∙dokni Assembly Speaker Thomas A. Sangma-ni, Congress Legislature Party (CLP) ni dilgipa Ronnie V. Lyngdoh ko Leader of Opposition (LO) seokanina gitcham Chief Minister aro Trinamool Congress (TMC) ni dilgipa Mukul M. Sangma-ko galchange seokaniara mande ra∙gija gita ong∙a ine gitcham dal∙dalgipa dilgiparang sing∙doaniko dakangaha.
Congress aro TMC dolo sakbonga prak MLA rang dongachim, aro uamangoni Dr. Mukul Sangma an Leader of Opposition ong∙na krabatgipa dilgipa ong∙achim maina ua saksa gitchambatgipa MLA aro unbaksana gitcham Chief Minister ba ong∙manahachim aro ua battanggimin somoioba LO ong∙angaha aro apsandaken donangkuna nangachim ine janapangaha.
Congress aro TMC dolgnian Assembly Speaker na LO-na lekkarangko sedoahachim, indiba Garo Hills a∙jao politics o susaanirang dongani a∙sel Mukul Sangma-na LO gadangna seokjaha ine NPP sorkari ko matnangataha. Dal∙gipa aro gitchambatgipa dilgiparangni aganani gitade Leader of Opposition-ko seokna Speaker na maming donggimin niam aro on∙gimin bilrang dongja ine agandapangaha.
