Re∙anggipa antio Risa colony-o donggipa buring damsao bilsi chu∙ongkugijagipa me∙chik bi∙sa ko sakgittam manderang drae til∙ekaha. Ua sakgittam dos dakgipa manderang jerangan ia mamla-o bak dongachim uamangko rim∙na gita man∙aha.
Pulisrangni aganani gitade, bristibar salni June 3 attamchipak Risa colony ni Secretary phone ka∙ate, sakgittam manderang bilsi chu∙ongkugijagipa me∙chik bi∙sa ko buringo drae til∙ekaha ine uamangna kobor ko on∙atskaaha ine aganskaaha.
Ia ong∙a obostako kobor man∙soa bakan Laitumkhrah pulis station oni pulis dolrang ta∙raken ua biapona chong∙motgipa sandianiko dakna gita re∙angaha, unon bilsi 18 ong∙gipa me∙asa aro bilsi chu∙ongkugijagipa me∙chik bi∙sa ni attamchipak ja∙achi buring ona roramangmitingo sakgittam manderang uamangko chadrapeaha aro uamangko buringo nikenba tangka rangko gamchina gita dabiaha ine ba aganaha.
Sakgni denggugipa manderang me∙asa ko namgija dake kal∙akenba saksa me∙chikko til∙ekskaaha. Me∙asa me∙chikko watchina gita agane uamang jeko aganagita dakgen ine mol∙molahachim indiba uamang drae kragijagipa kamko dakaha ine pulisrang aganaha.
Indake dosi ko dakgipa manderang uamangni bosturangko ra∙seke ra∙enba me∙chikko namgija dake til∙ekdraaha. Indiba me∙asa maibakai joke katenba Risa colony -ni dongchakram biapona dakchakaniko am∙na gita katangaha ine ba agandapaha.
Dosi dakgipa sakgni ko pulisrang Khliehshnong Malki-oniko budbar salo rim∙aha aro gittamgipa dosi dakgipa mandeko bristibar attamo rimska∙aha. IPC section 323, POCSO Act-o pangchake dosi dakgipa manderangko rim∙e donenga ine kobor ko parakataha.
