Bijoli ko den∙ani bidingo AYMBS-ni President neng∙nikanirangko janapata

Phulbari MePDCL sub-division ni ning∙o songdongenggiparang salantian bijoli-ko den∙simaniko aro voltage komie watani a∙sel, ru∙uta somoirangonin neng∙nikarangko man∙enga ine A∙chik Youths Movement for Betterment of Society(AYMBS)(CGB) H.Q Phulbari West Garo Hills-ni President Peter A. Sangma parakataha. Load shedding-ko a∙dok gimikon dakenga ine ma∙sichaka indiba load shedding-ni somoi ong∙jagenchimoba bijoliko den∙enga aro bijoli dongoba namen voltage komie watengani a∙sel a∙kawe jolo songdongenggipa manderang janggi tanganio neng∙nikaniko chagrongenga. Skul re∙enggipa chatro-chatri rang ba poraina gita neng∙nikanirangko man∙enga aro walo tuna bamna neng∙nikenga, unbaksana badinggiparangba an∙tangtangni kamrangko ka∙na neng∙nikanirangko man∙enga ineba janapataha. Ia namgijagipa mamla ong∙engon, je department-an iako jako ra∙engachim uno baditaba changna janapanirangko dakahachim indiba knachakgija dongaiaha aro Phulbari-ni local MLA aro Power Minister Shri, A.T Mondal-ba mikka waako sengna nangaigen aro Chibinang-ni Power Grid Cooperation Ltd-ko voltage komiani bidingo pa∙sike dongaiaha aro power Grid Project ko matchotjana kingking chinga mamingkoba dakna man∙jawa ine Power Minster talatadapaha. Indiba chingni ua biapona re∙ange sing∙sandianiko dakahaon Power Grid Cooperation Ltd.-o kam ka∙giparang ni aganani gitade ia project ko ru∙utbea somoirangonin matchotman∙ahachim aro ia power project ko Pulbari Sub-Station (33KV) onaba joraatmanahachim aro a∙dok sorkarini jako on∙atna gitaba tariman∙ahachim indioba a∙dok sorkari mamingkoba aganchakjaha aro dal∙e ra∙jaha ine u∙ina gita man∙aha.
Je Department rangan iani bidingo kamrangko ka∙engachim, uamangni mangsongmanchae ia bijolini project-ko a∙bachengatna kam ka∙gija dongenganiko u∙ina gita man∙enga.
Uni gimin chinga a∙dok sorkari aro iako kam ka∙enggipa department ko ta∙raken Power Grid Cooperation Ltd. baksa kam ka∙aniko dakchina mol∙molataha jedakode ua jolo donggipa manderangna neng∙nikanirangko chel∙atna man∙gen.