June jani 6 tarik-o Guwahati-o ding∙beani gimin Brahmaputra chibimao aue Meghalayani chadambe sakgni a∙sel ong∙aha. Ia a∙selara Chandrapur area-o ong∙aha aro uamang sak dok ba sak chet Meghalayani chadamberang jinma chibimao aue roengachim, uamangoni sakgni 12 bajimangni somoi-o gimaaha ine police rang parakataha.
A∙sel ong∙ako kobor man∙ani bakan pulis dol dariangaha aro State Disaster Response Force (SDRF) ni dakchakaniko am∙ataha. Ia am∙sandianiko dakna gita SDRF ni ring ge∙gniko jakkale 2 bajioni 6:15 bajiona sandianiko dakaha ine Pragjyotispur police station-ni officer-in-charge koborko parakataha. Saksa Mandeni manggisiko am∙sandie man∙aha, jean H Laloo ong∙achim, indiba sakgipin Rahul Chettri-ni manggisiko man∙kujaengani gimin am∙sandiangkugen indiba un salo wal andalangahani gimin am∙sandianiko dontongatna nangao ga∙akaha ine pulis dolrang agandapaha.
