Tura jilao songdongenggipa, Arun Agarwal jekon ru∙uta bilsirangoni bajar antini wilwilao donggipa mande saksa jean gisikni gita bilgrigipa mande ong∙achim uko ja∙rike, chadrapanirangko aro ka∙mik kenatanirangko dake neng∙nikanirangko on∙ronga ine koborko man∙soaha.
Adita salna skang ia apsan mande uko chadrape botolchi dokaha, uni skoo blongbee jokkom ong∙anichi matgipako kochepna nangpilaha. Dos dakgipa mandeko rim∙enba Tura Police Station-ona ra∙baon uko salgipinon watatpilaha maina uamangni sing∙sandianiko dakoa dosko dakgipa mande gisikni gita bilgrigipa ong∙a ine u∙iaha. Uko watpilaniara sakgipin bading-chiwale cha∙giparangnaba jemangan ia apsan mandeni jakchin batanggimin salrangoni neng∙nikanirangko man∙engachim, uamangnaba jajrenganirang ong∙enga ine kobor ra∙timgiparang parakataha.
Arun ni aganani gitade ua September 2019 bilsion sepangbatgipa police station ona reange badi ka∙eaha maina ua somoio ia mande jagni na kingking uko gol∙dik rae ja∙rike dongrongachim. Ia apsan mandean uni garini sisarangko chang∙brina kingking nosto ka∙ani bidingo police na u∙iataniko dakahachim ineba aganaha. Arun ni aganani gitade ua mande uko so∙otna mangsongenga ineba manderangni agananiko ua knana man∙aha.
