Da∙al salni bak o a∙dokni skotong Minister Conrad Sangma dingtang dingtang NGO dilgiparang baksa roster system aro reservation policy ni bidingo Tura Circuit House o chanchirimaniko dakangaha. Ia tom∙anio Deputy CM Prestone Tynsong, Health Minister Dr. Ampareen Lyngdoh aro HM Shangpliang dongpae bakko ra∙angpaaha.
Bang∙a NGO aro Union ko dilenggiparangna Roster System ni bidingo Conrad Sangma rongtale talate on∙angaha. Ia tom∙anio bakko ra∙giparangni adita sing∙anirang aro nangnikanirangko agantalataha aro uamang reservation policy aro Expert Committee ni bidingo sing∙anirangkoba dakangaha.
Adita salrangni ja∙mano cabinet tom∙bimonge roster system ko name dake ragataniko dakgen ine Conrad Sangma parakataha. Expert Committee ia reservation policy ko dingtang dingtang gadango golporime sakantini nangnika gita kamko ka∙na jotton ka∙gen ine Conrad Sangma agantalataha.
